Patay ang isa ka barangay kagawad sa Dawis, New Lucena, Iloilo matapos ginbuno sang grupo sang mga lalaki subong nga Byernes Santo.
Ang biktima amo si Kagawad Ric Porquez.
Sa interview sang Bombo Radyo kay Police Corporal Greg Gonce, assistant investigator on case sang New Lucena Municipal Police Station, iya ginpahayag nga may yara sang mga lalaki nga nagasakay sa duha ka mga tricycle nga posible mga pamilya halin sa ‘outing’ kag nagdulog sa Bangga Dawis.
Suno kay Corporal Gonce, nagreklamo ang dalagita nga nagabantay sang baligyaan sang pantat bangud daw kaangay nga “bastos” ang pagtulok sa iya sang duha ka mga lalaki.
Bangud sini, ginsugid sang dalagita kay Kagawad Porquez ang natabo kag ginhambalan sini ang mga kalalakihan.
Posible, pahayag sang natungdan, nga may pagbinaisay kag komusyon nga natabo sa tunga sang mga lalaki kag sang Barangay Kagawad, tubtub nga may isa ka lalaki nga nagbuno sa tiyan sang barangay official kag gilayon ang mga ini nagpalagyo padulong sa Pototan.
Sa subong, padayon ang imbestigasyon sang mga kapulisan kag nagapadayon man ang hot pursuit operation.
(Text: Bombo Lynd-C Bade; Screengrab from: Joebet Malones Plomes)
