ILOILO– Gin lunsyar na ang Barangay Kapitolyo Smoke-Free Campaign sa Iloilo Provincial Capitol.
Sa interview sang Bombo Radyo kay Dr. Patricia Grace Trabado, Provincial Health Officer iya ginpahayag nga katuyuan sang nasambit nga kampanya amo nga mangin smoke-free ang bilog nga kapitolyo.
Suno kay Trabado, ila bisitahon ang tanan nga opisina sa kapitolyo agud magpatigayon sang health education campaign sa diin may pilion sila nga tawo nga in-charge sa kada opisina agud magserbi nga advocate.
Ginpahayag niya nga magapatigayon man sila sang profiling sang health status sang Capitol personnel.
Matandaan nga sang nagligad nga Hulyo, nag isyu si Governor Arthur Defensor Jr. sang executive order nga nagamando sang strikto nga pagpatuman sang Iloilo Provincial Ordinance 2016-127 sa tanan nga provincial government facilities pareho sang Iloilo Provincial Capitol, Iloilo Sports Complex, Covered Gym, Motor Pool, Iloilo Provincial Hospital, kag 11 district hospitals.
Ang ordinansa nagadumili kag naga silot sa paggamit ,pagbaligya, distribusyon, kag advertisement sang sigarilyo kag iban nga tobacco products sa pila ka lugar sa probinsya.
