Gintawag sang Iloilo Police Provincial Office (IPPO) nga isolated cases lamang ang sunod-sunod nga mga barangay officials sa probinsya nga nagkaladakpan sa mga drug buy bust operation.
Sa interview sang Bombo Radyo kay Police Lt. Colonel Rolando Araño, spokesperson sang IPPO, iya ginpahayag nga bisan may mga naaresto, nagapabilin naman ang mayorya nga barangay officials nga aktibo sa ila trabaho kag nagakooperar sa mga pulis.
Suno pa kay Araño, indi man makaalarma ang kadamuon sang iligal nga droga nga nakumpiskar apisar nga minilyon ka pesos ang balor sini.
Pahayag sini, pamatuod lang ini nga aktibo sa pag-report sa pulis ang mga pumuluyo, gani nga nadakpan, kag napunggan nga madala ang droga sa target market ukon mga drug users.
Nahibaluan nga lakip sa naaresto sa drug buy bust sa Iloilo sang damlag lang amo ang tatlo ka mga punong barangay lakip ang isa halin sa Janiuay kag duha ang halin sa San Dionisio. May yara man sang incumbent barangay kagawad, kag ang latest amo ang isa ka Sangguniang Kabataan Chairman nga nadakpan sang Pebrero.
Padayon naman ang kapulisan suno kay Araño sa ila nga monitoring kag pagpatigayon sang mga operasyon batok sa mga durugista. May ginahanas man sila nga mga ido agud nga magamit nila sa mga drug buy bust, amo man sa checkpoint kag sa iban pa nga strategic locations.#
