Wala pa may nabaton ang Barangay San Isidro, Jaro Iloilo City nga food boxes nagikan sa Department of Social Welfare and Development (DSWD).
Sa interview sang Bombo Radyo kay Punong Barangay Felix Doreza, iya ginpahayag nga sa masobra 4,000 ka pamilya sa ila barangay, gina-amat-amat na nila tumod ang ‘poorest of the poor’ niya nga pumuluyo nga amo lamang ang pagahatagan sang ayuda.
Suno kay Doreza, sa subong, may nabilin pa man nga mga bugas kag delata ang ila nga barangay nga ila man ginapanagtag sa mga pumuluyo nila nga na-quarantine kag tuman nga nagakinahanglan.
Pahayag sang opisyal, ginatinguhaan man niya nga mapahangop sa iya pumuluyo nga sa tion nga mag-abot sa ila barangay ang ayuda nagikan sa DSWD, mahimo nga pili lamang ang mga mahatagan bangud indi ini mangin bastante para sa tanan.
Samtang, sa bahin sang Barangay Bolilao Mandurriao, Iloilo City, 84 ka food boxes ang nag-abot nagikan sa DSWD.
Sa exclusive interview sang Bombo Radyo kay Punong Barangay Joy Salpin, iya ginpahayag nga nagpatigayon siya sang emergency meeting kaupod ang iya barangay council agud mahusayan kun paano matunga sa masobra 2,000 ka pamilya ang 84 lamang ka food boxes.
Gin-ako ni Salpin nga nabudlayan siya magdesisyon kun paano tungaon sa tanan niya nga pumuluyo ang ayuda nga ginhatag sang gobyerno.
Sa pihak sini, nagapasalamat na lamang ang opisyal nga nakabaton man ang ila nga barangay sang ayuda sa tunga sang mapin-ot nga sitwasyon tuga sang pandemya.
