Nagahanda na ang mga barangay officials sa Brgy. Poblacion, Molo, Iloilo City para sa palaabuton nga Pista Minatay.
Sa interview sang Bombo Radyo kay Barangay Kagawad Sussane Mates, iya ginpahayag nga isa sa ila preparasyon ang pagpahamtang sang mga tanod sa palibot sang patyo agud maggiya sa mga bisita kag magmintinar sang kalinong.
Suno sa iya, may mga gin-assign man nga lugar para sa mga manugbaligya sang bulak kag kandila agud nga mangin matawhay kag organisado ang lugar.
Pahayag pa niya nga ginapreparar naman ang mga suga nga igakabit agud masanagan ang palibot sang patyo.
Ginpakigbahin man ni Mates nga ila ginapreparahan sang lihuk ang palaabuton nga pista minatay agud mangin matawhay ang pagbisita sang publiko sa ila pinalangga nga nagtaliwan kag malikawan ang mga insidente nga mahimo magresulta sa kinagamo.
Ginpahayag man niya nga ginapaabot ang pagbisita sang kilala nga pamilya nga may mga himata nga nalubong sa Molo Cemetery, lakip na ang pamilya ni former City Mayor Jed Mabilog, pamilya Ganzon kag iban.
Dugang pa ni Mates, nagapasalig siya nga handa ang mga barangay official kag tanod nga magserbisyo sa publiko apang ginapanawagan sa gihapon ang mga ini nga magkooperar sa mga ginapatuman nga pagsulundan agud masiguro ang kahilway kag kalinong sa patyo.
