Ginapreparahan na sang mga Barangay Officials sa syudad sang Iloilo, ilabi na ang may nabilin pa nga termino ang palaabuton nga Barangay kag Sangguniang Kabataan Elections (BSKE) nga patigayunon sa Disyembre 2025.
Sa interview sang Bombo Radyo kay Rodel Mamon, Punong Barangay sang Ungka, Jaro, Iloilo City, iya ginpahayag nga nakahanda na sila kon madayon ang eleksyon subong nga tuig.
Suno kay Mamon, wala naman sang problema kun matuman ang eleksyon, bangud nahimo naman niya ang iya mga responsibilidad bilang isa ka Barangay kapitan sa nasambit nga lugar.
Dugang pa ni Mamon, madamo na sang mga proyekto ang ila napatuman kag napuslan naman sang komunidad, rason nga kuntento siya sa ila mga nahimo sa sulod sang iya termino.
Ginpanindugan niya nga handa sila sa ano man nga desisyon sang Commission on Elections (Comelec).
Madumduman nga opisyal na nga ginlunsyar sang Comelec, upod ang nagkalain-lain nga ahensya sang gobyerno kag mga organisasyon ang preparasyon para sa BSKE 2025.
Ginkumpirmar ni Comelec Chairman George Erwin Garcia nga magabukas liwat ang voter registration halin Hulyo 1 tubtob Hulyo 11.
Ang pagsumite naman sang Certificate of Candidacy (COC) magaumpisa sa Oktubre 1 tubtob Oktubre 7.
Nagapanawagan ang Comelec sa publiko, ilabi na sa mga kabataan kag barangay constituents, nga magpartisipar kag magpabilin nga aktibo sa demokratiko nga proseso.
