ILOILO CITY – Indi makabaton sang honorarium kag indi pagpahanugutan nga maka-upod sa masunod nga Lakbay Aral ang mga barangay official sa syudad sang Iloilo nga mapaslawan sa pagpasa sang re-entry action plan.
Sa interview sang Bombo Radyo kay City Department of Interior and Local Government Officer Roy Defiño, iya ginpahayag nga 20% ukon ginabanta 50 pa lang ka barangay council ang nagpasa sang re-entry action plan.
Suno kay Defiño, nakasaad sa re-entry action plan amo ang mga natun-an sang mga barangay official sa ginpatigayon nga Lakbay Aral sang Seytembre 3 tubtub 7, 2019.
Ang mga natun-an sang mga barangay official kasubong sang Proper Waste Management, Anti-Dengue Campaign kag iban pa nga mga proyekto ang kinahanglan nga ipatuman sa ila barangay sa diin ang City Department of Interior and Local Government ang magapatigayon sang monitoring.
Sa tion nga indi makapasa sang re-entry action plan, ginpahayag sang natungdan nga indi pagpirmahan sang iya staff ang honorarium sang barangay officials sang isa ka barangay.
