JARO, ILOILO CITY – Gin-kumpirma sang barangay officials sang Balantang, Jaro, Iloilo City nga abandonado na ang gina-alegar nga cybersex den sa 6th Street, 1st Lane sang Lawaan Village nga gin-raid sang mga otoridad sa diin nadakpan ang 17 ka mga undocumented nga Chinese nationals.
Ang nasambit nga joint operation nga ginpatigayon sang Nobyembre 4, 2023 ang bunga sang pagbuligay sang Iloilo City Police Office-City Intelligence Unit, City Drug Enforcement Unit, Iloilo City Mobile Force Company, Iloilo City Police Station 3, kag Regional Anti-Cybercrime Unit-Western Visayas sa diin narekober ang mga naga-uba nga pictures kag videos sang Filipinos kag iban pa nga nationalities.
Sa interview sang Bombo Radyo kay Punong Barangay Allan Jastia, iya ginpahayag nga humalin sang gin-raid sang mga pulis ang balay, wala na sang may nag-istar diri.
Suno kay Jastia, ang mga nadakpan ang indi permanente nga residente sang ila barangay rason nga wala ini sang ihibalo sa ila background.
Wala man ang mga ini nag-apply sadto sang applications ukon permits agud mag-operate sang businesses sa lugar.
Wala naman sang ideya ang opisyal sa pangalan sang tag-iya sang balay, apang ang impormasyon amo nga nagatrabaho ini sa luwas sang pungsod.
