ILOILO CITY – Nagbunga ang pagpanikasog kag ang pagbuligay sang mga barangay official kag pumuluyo sang Barangay Javellana sa Distrito sang Jaro matapos nga nakapasar ang nasambit nga lugar bilang drug-cleared barangay sa syudad sang Iloilo.
Sa interview sang Bombo Radyo kay Punong Barangay Emmanuel Ogacion, iya ginpahayag nga personal niya mismo nga ginahingyo ang mga drug personality sa ila lugar nga magpaidalom sa drug rehabilitation.
Suno kay Ogacion, sa 42 ka barangay sa distrito sang Jaro, walo ang nag-apply para sa drug-clearing apang isa lang ang Barangay Javellana nga nakapasar.
Ginpahayag ni Ogacion nga magluwas sa pagpanikasog nila nga mga barangay official, nagabulig man ang mga pumuluyo ilabi na sa pagpahibalo kun sanday sin-o ang mga nagakinahanglan sang drug rehabilitation.
Ini ang rason suno kay Ogacion kun nga-a natuman nila ang tanan nga parameters nga ginahingyo sang Regional Oversight Committee.
