Wala sang ihibalo ang mga barangay official sang Mohon, Arevalo, Iloilo City may kaangtanan sa ginhiwat nga “The Hooch: Rap Battles Performances” sa nasambit nga lugar.
Matandaan nga 53 ka mga indibidwal nga nadakpan sa akto matapos naghiwat sang nasambit nga event sa isa ka establisimento nga naga-operate man bilang restobar kag nagaserbe sang makahulubog nga ilimnon sa mga customers.
Sa interview sang Bombo Radyo kay Punong Barangay Rico Francis Acap, iya ginpahayag nga madugay na nga naga-operate ang amo nga establisimento bilang baligyaan sang motor parts.
Suno kay Acap mangin siya ang nakapakay-o sadto sang iya motorsiklo sa nasambit nga shop apang wala gid siya nakatalupangod nga sa likod sang shop, may venue nga kibon nga naga-operate kun gab-i bilang restobar kun sa diin may ginahiwat nga Rap Battles Performances.
Nahibaluan nga gin-isyuhan na sang citation tickets ang mga nagbayolar sang Regulation Ordinance No. 2020-095.
Gindagdagan man sang penalidad ang tag-iya sang restobar nga si Vinjun Silla kag gilayon nga ginsirado ang establisimento.
