Nagpanawagan ang barangay officials sang Passi city nga magtuman sa tanan nga health protocol agud mapauntat ang pagtimbuok sang kaso sang COVID-19 sa lugar.
Nahibaluan nga ang Passi City ang sa subong, ginapaidalom sa Enhanced Community Quarantine (ECQ).
Sa interview sang Bombo Radyo kay Barangay Kagawad sang Aglalana Garly Padernal, iya ginpahayag nga kada adlaw, may yara sang nagalibot nga mga tanod sa kada barangay agud magtsikyar sa mga pumuluyo nga nagalapas sang health protocol kaangay sang physical distancing kag insakto nga pagsuksok sang face mask.
Gintuad ni Padernal nga may yara sa gihapon sila madakpan nga wala nagasuksok sang mask apang nagapati man kun sawayon.
Nagpanugyan man ang natungdan sa pumuluyo sang Passi City nga indi magkakapoy sa pagsunod sa mga pagsulundan kag maghatag sang sakripisyo agud amat-amat nga matapna ang lapnagon nga pagsaka sang kaso sang COVID-19 sa lugar.
Matandaan nga una na ginpahayag ni Passi City Mayor Atty. Stephen Palmares, nga sa latest nga 270 ka mga talipapa vendors nga ginpaidalom sa Reverse transcription polymerase chain reaction (RT-PCR) test, 55 ang mga nagpositibo sa COVID-19.
Sa subong, may masobra 200 na ka mga vendor sa Passi City ang nalatnan sang COVID-19.
