Barangay officials sang Sto. Niño Norte, Arevalo, hugot nga ginabantayan ang mga resorts kag baybayon nga mahimo magtuga sang pagtililipon sang mga tawo

Hugot nga ginabantayan sang mga barangay officials sang Sto. Niño Norte, Arevalo, Iloilo City ang mga resorts nga sakop sang nasambit nga lugar.

Sa interview sang Bombo Radyo kay Barangay Kagawad Dorlyn Espura, iya ginpahayag nga bangud sa mandu ni Presidente Rodrigo Duterte nga dakpon ang mga punong barangay nga mapaslawan nga sundon ang direktiba nga dumli-an ang mass gatherings, mas ginpasangkad pa sang ila nga barangay ang pagbantay sa baybayon ukon mga resorts.

Suno kay Espura, kun may mga mapaligo sa baybay, gina-abisohan gid nila nga mga opisyal nga ipa-iway anay samtang nagataas pa ang kaso sang COVID-19 sa syudad.

Nahibaluan nga ang Philippine National Police (PNP) kag tanan nga mga law enforcement agencies amo ang ginhatagan sang mandu sang presidente kasunod sang mga insidente sang mass gatherings lakip na ang paghiwat sang picnics kag parties.