Handa nga magbulig ang mga barangay official sang Zone 5, Boulevard, Molo, Iloilo City sa pamilya sang iloy nga napatay lakip na ang iya ginabusong nga lapsag matapos ginaalegar ginkastigo sang mag-asawa nga maestra kag isa ka retirado nga pulis.
Ang biktima amo si Lorry Mae Baylon, 27, kag residente sang nasambit nga lugar.
Samtang ang mga suspek naman amo ang mag-asawa nga Chona Agana, isa ka maestra sa Molo 1 Elementary School kag bana niya nga si retired Police Staff Sergeant Joseph Agana.
Sa interview sang Bombo Radyo kay Punong Barangay Virgilio ‘Kano’ Villanueva, iya ginpahayag nga bantog na subong ang kontrobersyal nga pagpangkastigo sang asawa nga Agana sa biktima nga si Baylon.
Suno kay Villanueva, sang ginpulihan sang pila ka mga myembro sang pamilya sang mag-asawa nga Agana si Baylon, naigo pa ang tyan sini sang ginsipa ang gate sang balay sang biktima.
Pahayag sang Punong Barangay, makapila na nga wala nadayon ang pag-atubangay sang mag-asawa nga Agana kag ni Baylon sa Barangay Hall bangud masami nga nagasakit ang tyan sang biktima.
Ipaidalom man sa autopsy ang bangkay ni Baylon agud mahibaluan ang matuod nga gintunaan sang iya kamatayon.
Nahibaluan nga wala naman ang bana sang biktima sa ila balay bangud yara ini sa Manila.
