ILOILO CITY – Nagdangat sa walo ang active cases sang COVID-19 sa Barangay Quintin Salas, Jaro, Iloilo City subong nga bulan sang Enero.
Sa interview sang Bombo Radyo kay Barangay Kagawad Victoria Roel, chair sang Committee on Health sa nasambit nga barangay, iya ginpahayag nga Enero 17 sang nag-umpisa sulod ang nasambit nga mga kaso kag nag-asud asud na pasaka.
Suno kay Roel, posible nga sa trabaho na-infect ang iban nga mga pasyente. Ang iban sa ila ang nagatrabaho man bilang mga frontline workers.
Sa subong suno sa natungdan, lunsay yara sa quarantine facility ang mga pasyente.
Ang mga naka-close contact sang mga pasyente ang napaidalom na sa swab test kag negatibo man ang resulta.
Matunog ang panawagan sang barangay agud mapadayon sang mga pumuluyo ang pagsunod sa mga minimum health protocols batok sa COVID-19.
