Wala na ginhulat sang mga opisyal sang Barangay San Juan, Molo, Iloilo City ang Nobyembre 16 sa pagpatigayon sang Oplan Hawan Karsada.
Sa interview sang Bombo Radyo kay Punong Barangay Pascual Sipil Espinosa IV, iya ginpahayag subong pa lang, gina-amat amat na paandam ang mga pumuluyo nga likawan ang pag-illegal park sang ila mga salakyan.
Sa weekend, Nobyembre 14, mas pasangkadon pa ang kampanya suno sa natungdan agud malibot kag mapahangop sa mga kapin 13,000 ka mga pumuluyo kun ano ka importante ang road clearing operations.
Ang road clearing operations nga ginmandu ni Department of the Interior and Local Government Secretary Eduardo Año paagi sa Memorandum 2020-145 ang magaumpisa sa Lunes, Nobyembre 16.
Sa syudad sang Iloilo, nagapangayo sang suporta si Iloilo City Mayor Jerry Treñas sa mga opisyal sang barangay agud ma-comply ang mandu sang DILG kag mahawanan ang syudad.
