ILOILO – Nagapadayon pa ang imbestigasyon sang mga otoridad sa natabo nga pagluthang-patay sa Barangay Tanod sa Barangay Amparo, Pavia, Iloilo.
Ang biktima amo si Carmelino Minor, Jr., 52, residente sang nasambit nga barangay.
Sa interview sang Bombo Radyo kay Kagawad Romar Gaborno, Chairman sang Peace and Order sa nasambit nga barangay, iya ginpahayag nga una nga bes kuntani sang biktima nga mag-duty sa namatyan antes ginpatay kagab-i.
Suno kay Gaborno, nagdul-ong pa ini sang bag-o nga uniporme sa balay sang biktima.
Apang nakibot na lang ang mga pumuluyo sang nakabati sang lupok sang pusil.
Ginpahayag sini nga nakabaton nalang ini sang tawag nga may lalaki nga nasapwan nga nagahamyangon sa lugar.
Nagdumdom pa sila nga hubog lang ini, apang sang ila ginhimutaran, natumod nga si Minor ini kay may igo na sang bala sa nawala nga dughan.
