ILOILO CITY- Ginaplastar na sang mga barangay sa Syudad sang Iloilo ang ila plano sa tion nga aprubahan sang National Inter-Agency Task Force ang apela ni Iloilo City Mayor Jerry Trenas nga ipataas sa modified enhanced community quarantine (MECQ) gikan sa modified general community quarantine (MGCQ) ang status sang syudad bangud sa nagasaka nga COVID-19 cases.
Sa interview sang Bombo Radyo kay Punong Barangay Lilibeth Eduardo sang Brgy. Burgos-Mabini, Lapaz, Iloilo City, iya ginpahayag nga kon ipatuman na ang MECQ, isa sa ila inisyatibo amo ang pagpang-house to house agud mangdul-ong sang food packs sa baylo nga magpatigayon sang community pantry.
Suno kay Eduardo, ini agud nga malikawan ang pagtumpok sang tawo nga mahimo magresulta sa paglapta pa sang virus.
Matandaan nga una nga nagpagwa ang alkalde sang Executive Order Number 41 sa diin nasaad ang mga pagsulundan sa tion nga ipatuman na ang MECQ.
Nalakip sa mga pagsulundan ang pagdumili nga maggwa sa balay umpisa las 10:00 sa gab-i tubtob las 4:00 sang kaagahon magluwas lamang sa mga medical, government kag uniformed personnel nga required sa pagtrabaho sa night shift.
Ginamanduan man nga indi magwa sa balay ang vulnerable sectors nga ginalakipan sang:
- Mga indibidwal nga nagaedad sa masobra 65 anyos;
- Mga indibidwal nga nagaedad 18 panubo;
- Mga nagabusong;
- Mga indibidwal nga may commorbidities, ukon nagkalain-lain nga balatian, may immune-deficiencies kag iban pa nga risk factors; kag
- Mga indibidwal nga may sablag sa lawas ukon persons with disabilities
Samtang, ang mga establisemento komersyal kag aktibidad nga ginadumilian nga mag-operate sa idalom sang modified enhanced community quarantine (MECQ) amo ang masunod:
- Entertainment venues kaangay sang karaoke bars, bars, clubs, concert halls, theaters kag cinemas;
- Internet cafes, billiard halls, amusement arcades, bowling alleys;
- Outdoor sports kag indoor sports;
- Fitness studios, gyms, spas, swimming pool kag iban pa nga kalingawan nga aktibidad; kag
- Casinos, horce racing, cockfighting kag operation sang cockpits, lottery kag betting shops.
Limitihan sa 30 percent capacity ang tanan nga religious gatherings lakip na sa restaurant, opisina, kasal, kag bunyag.
20% naman ang seating capacity sa mga restaurant.
