Ginadumilian nga ipaguwa sa mga sinehan sa Vietnam ang upcoming movie nga Barbie bangud sa mga eksena nga may mapa nga nagapakita sang nine-dash line area nga gina-claim sang China.
Ini nga fantasy comedy film sa idalom sang direksyon ni Greta Gerwig kag sa pagpanguna sang stars nga sanday Margot Robbie kag Ryan Gosling ang natalana kuntani nga ipaguwa sa Vietnam sa Hulyo 21.
Apang indi na ini matabo bangud nag-desisyon na ang gobyerno nga kakason ang performance shedule sini sa websites sang major cinema chains sa pungsod kag i-ban na ang screening sang movie bangud sa pag-feature sini sa nine-dash line.
Nahibaluan nga madugay na ginagamit sang China ang nine-dash line agud i-ilustrar kun ano ang ila nasakpan sa teritoryo nga naga-overlap naman sa exclusive economic zone claims sang Brunei, Indonesia, Malaysia, Pilipinas, Taiwan, kag Vietnam.
Ginpahayag nga makapila ka beses gid nagguwa ang nine-dash line sa pelikula kag wala nakalusot sa censors sang Vietnam nga amo ang nagasala sa content nga may gratuitous violence, suggestive sex scenes, ukon politically-sensitive nga material.
Nahibaluan nga indi ini ang una nga pelikula nga gin-ban sa Vietnam bangud sa amo nga rason.
Sang nagligad nga tuig, gin-ban man ang “Uncharted,” ang action-and-adventure movie nga bida si Tom Holland, bangud man sa pag-feature sa nine-dash line.
Sang 2018, ginpakakas man sang Vietnam ang eksena sa romantic comedy nga “Crazy Rich Asians” kun sa diin nakit-an ang designer bag nga may mapa sang kalibutan nga makit-an ang disputed South China Sea islands sa idalom sang kontrol sang China.
Sang 2019, wala man nakalusot sa Hanoi ang animated DreamWorks film nga “Abominable” bangud sa amo nga isyu.
Sang 2022, ginpakakas man sa Netflix ang episodes sa Australian spy drama nga “Pine Gap” bangud sa amo gihapon nga rason. #
