Liwat nga magasugat-anay ang banas sang box office hits nga “Barbie” kag”Oppenheimer” sa awards show sa Hollywood antes pa man ang ginakalangkagan sang tanan nga Academy Awards ukon Oscars!
Pareho nga may tag-apat ka nominasyon ang duha ka nasambit nga pelikula sa Screen Actors Guild awards.
Isa sa “Barbenheimer” ang posible makakuha sa pinakamataas nga pagkilala sa amo nga show nga amo ang “Best Movie Cast” apang kinahanglan man sini atubangon ang “The Color Purple,” “Killers of the Flower Moon” kag “American Fiction”.
Sa Best Actress, nominated ang “Barbie” star nga si Margot Robbie, samtang ang iban pa sini nga nominasyon amo ang para sa supporting actor nga si Ryan Gosling ukon si Ken, kag amo man ang stunt performers sa movie.
Sa Oppenheimer, nominated si Cillian Murphy sa best actor; samtang nominated man sanday Robert Downey Jr. kag Emily Blunt sa ila nga supporting roles.
Ginabantayan gid ang Screen Actors Guild awards bangud ginabug-usan man sang mga aktor ang pinakadaku nga grupo sang voters para sa Oscars nga patigayunon na sa Marso.
Ang mga magadaog sa SAG awards ang pasidunggan sa red-carpet ceremony sa Los Angeles sa Pebrero 24.
Sa amo man nga event, hatagan sang lifetime achievement honor ang singer, actor kag director nga si Barbra Streisand nga amo ang star sa “Funny Girl,” “A Star is Born” kag iban pa nga classic films. #
