Gin-report sang West Philippine Sea monitor kag maritime expert nga si Ray Powell nga naglabay ang barko sang China Coast Guard (CCG) sa lima ka maritime features sang West Philippine Sea samtang nagapatigayon ini sang “resupply cruise” sa ila outposts sa Spratly Islands.
Suno kay Powell, ang barko nga Sansha 2 Hao ang una nga naglayag sa Pag-asa (Thitu) Island sang Domingo sang aga kaupod ang San Sha Zhi Fa 301.
Sunod man nga naglayag ang duha ka barko malapit sa Patag (Flat) Island, Lawak (Nanshan) Island, Escoda (Sabina) Shoal, kag Ayungin (Second Thomas) Shoal.
Kahapon, Lunes, nakit-an ini nga mga barko nga sulod sa 60 nautical miles sa coastline sang Malaysia.
Nagapati ang maritime expert nga duha ang tuyo sang China kun ngaa ginpadala ang amo nga mga barko — una, agud magdul-ong sang suplay sa Spratly Island bases, kag agud markahan ang ila maritime claims.
Ini nga barko ang magluwas pa sa na-report man nga Chinese aircraft carrier sa nakatundan nga bahin sang Luzon.
Ini nga aircraft carrier sang People’s Liberation Army-Navy nga Shandong ang nag-abot 200 nautical miles ang kalayuon halin sa Luzon sandig sa gin-report sang English-language Chinese newspaper nga Global Times.
Ini amo ang ginapahayag nga most advanced aircraft carrier nga ginagamit sang China.
Suno sa satellite image nga gin-provide sang MizarVision nga isa ka Shanghai-based technology kag intelligence company, nakit-an ini nga nagalayag pa-naaminhan-nakatundan ang Luzon sa West Philippine Sea.
Mangin ang European satellite nga Sentinel-1 ang naka-detect man sa amo nga aircraft carrier nga nagapatrolya sa West Philippine Sea.
Kun basehan ang Sentinel-2, may nagbiya nga aircraft carrier sang nagligad nga semana sa Sanya, Hainan province nga amo ang homeport sang Shandong carrier.
Wala pa sang kumpirmasyon halin sa Chinese kag Philippine Defense departments kaangot sini.
