Ginhana sang barko sang China nga bungguan ang mas gamay nga barko sang Pilipinas samtang yara sa West Philippine Sea.
Ini amo ang China Coast Guard (CCG) vessel 3302 nga nakuhaan gid sang video sang gintuyo sini nga mahimo ang head-on collision batok sa BRP Cabra sang Philippine Coast Guard (PCG) samtang yara sa distansya nga 170 kilometros halin sa Zambales.
Suno kay Commodore Jay Tarriela, PCG spokesperson para sa West Philippine Sea, delikado ang pagdala sa barko sang China kag daw kaangay nga wala na ini sang labot sa safety sang crew nga yara sa Philippine vessel.
Bisan pa ginaradyuhan, nagpadayon sa pagpalapit ang Chinese vessel.
Gindayaw ni Tarriela ang “seamanship skills and professionalism” sang crew sa BRP Cabra bangud nalikawan nila ang pagbungguanay nga kun natabo nagresulta kuntani sa malala nga halit kag tensyon.
“It is important to note that the China Coast Guard vessel 3302 has engaged in reckless and dangerous maneuvers, displaying a blatant disregard for safety. An alarming incident this afternoon involved an attempted head-on collision with the smaller PCG vessel, raising concerns about the China Coast Guard’s adherence to the Convention on the International Regulations for Preventing Collisions at Sea, 1972 (COLREGs), of which they are a signatory. It is only through the seamanship skills and professionalism of the crew of BRP Cabra that such collision was narrowly averted,” suno kay Tarriela.
Suno pa sa PCG, napunggan sang BRP Cabra ang Chinese vessel nga magpalapit pa sa baybayon sang Pilipinas. Sa latest update, nahamtang ini sa distansya nga 92-96 nautical miles halin sa Capones Island.
Ginpasalig ni Tarriela nga apisar sang diutayan lang matabo nga insidente, magapadayon ang PCG vessel sa pagkumpronta sa iligal nga pagpatrolya sang barko sang China sa teritoryo sang Pilipinas.
“Despite these provocative actions, the PCG maintains a composed and professional approach, prioritizing safety and the prevention of any untoward incidents,” kabahin sang statement sang PCG official.
Sang Sabado, matandaan nga ginradyuhan ang amo man nga barko sang Beijing matapos nasiplatan nga nag-abante ini sa kalayuon nga 83 tubtub 85 nautical miles halin sa Palauig, Zambales.
Nahibaluan nga isa ang CCG 3302 sa siyam ka mga barko sang China nga gin-report nga nagapatrolya sa sulod sang exclusive economic zone (EEZ) sang Pilipinas sang Enero 2025. Ang amo man nga barko ang nag-bomba sang water cannon kag nagbunggo sa BRP Datu Pagbuaya sang Pilipinas kadungan sang isa ka misyon malapit sa Scarborough Shoal sang Disyembre 2024.
