Wala ginsapak sang barko sang China ang pag-radyo sang Philippine Coast Guard (PCG) samtang nagalayag ini sa sulod sang exclusive economic zone (EEZ) sang Pilipinas.
Suno kay Commodore Jay Tarriela, ang spokesperson sang PCG para sa West Philippine Sea, nagpadala ang ahensya sang islander aircraft agud mag-monitor kag magpalab-ot sang mensahe sa Chinese vessels kaina sang aga.
Pag-abot sa Batanes, nag-isyu sang radio challenge ang PCG sa CCG-4304 nga nagasiling nga wala ini sang legal nga awtoridad nga mag-operate sa kadagatan sang Pilipinas. Sa pihak sini, wala sang sabat nga nabaton ang PCG.
“Upon locating the CCG-4304, the crew issued radio challenges, emphasizing that the vessel lacks legal authority to operate within the Philippines’ exclusive economic zone,” suno kay Tarriela. “Unfortunately, the CCG vessel did not respond.”
Nakit-an ang CCG-4304 sa nakatundan nga parte sang Batanes nga ginabanta 75 nautical miles sa nakatundan sang baybayon sang Sabtang island.
Sa pihak nga bahin, sandig sa na-detect sang Dark Vessel Detection system sang Canada, nakit-an ang duha ka iban pa nga Chinese ships nga may bow numbers nga 3301 kag 3304 sa nasidlangan naman nga parte sang Batanes.
Wala ugaling sila naradyuhan sang PCG bangud malayo ini kag malain na ang tyempo.
“Consequently, adverse weather conditions and the distance to the other two CCG vessels (3304 and 3301) prevented the aircraft from reaching their locations,” pahayag pa ni Tarriela.
Apang dugang sini, preparado ang ahensya nga magpadala sang dugang nga resources pananglitan magpakatig-a pa gid ang Chinese vessels sa paghalin kag magapadayon sa pag-abante sa coastline sang Batanes.
Nahibaluan nga ang CCG 4304 kag 3304 ang pareho nga 112-meter Zhouyu class patrol ships nga armado sang 76 millimeter main gun, samtang ang CCG 3301 naman isa ka 98-meter Shucha II-class vessel nga may karga nga 37mm main gun.
Una na nga nagpahayag ang SeaLight director nga si Ray Powell nga ang posisyon sang tatlo ka mga barko ang nagasunod sa bracketing pattern.#
