Nagsulat si Iloilo City Lone District Representative Julienne ‘Jamjam’ Baronda kay Justice Secretary Jesus Crispin Remulla agud nga gilayon nga ma-imbestigaran ang makaduluda nga pagdamo sang Chinese nationals sa syudad.
Sa sulat nga napetsahan sang Hulyo 2 kag napasaka sa Department of Justice (DOJ) sang Hulyo 4, ginsiling sang kongresista nga nakabaton ini sang reports nga may mga Chinese nga naga-istar sa mga subdivision sa syudad particular sa Puerto Real de Iloilo kag Ledesco Subdivision sa Lapaz, Monterosa Subdivision sa Mandurriao, kag iban pa nga lokasyon sa Iloilo City.
Suno kay Baronda, apisar nga wala man nagapanggamo ini nga foreigners sa komunidad kag nangin maayo man sa ila kasilingan, nagakahangawa lamang ang mga Ilonggo bangud sila ang halin sa mainland China kag indi halos makahambal sang English.
Interesante man suno sa iya nga ini nga Chinese nationals ang nakabakal sang mga balay sa balor nga P30-million tubtub P50-million kag may yara man sang luxury nga sports utility vehicles (SUVs).
Apisar nga suspetsa pa lamang ang tanan suno kay Baronda, mas maayo kun i-validate ini kag tumuron kun ini nga mga tawo ang nagapakigbahin man sa iligal nga aktibididad.
Gin-cite man sini ang ginakahangaw-an subong sang mga Pinoy nga Chinese “sleeper agents”; ang kaso ni Bamban, Tarlac Mayor Alice Guo nga nagguwa nga isa gali ka Chinese national nga si Guo Hua Ping; kag ang kaso sang 17 ka Chinese nationals nga nadakpan anay sa ginaalegar nga cybersex den sa Balantang, Jaro sang Nobyembre 2023 nga gina-alegar involved man sa human trafficking.
“While these are mere suspicions, it is better to validate the veracity of these reports and determine whether these alleged Chinese are engaged in nefarious activities or not, as the Filipino people are worried about the so-called Chinese sleeper agents given the fact that your agency, the National Bureau of Investigation, has verified that Mayor Alice Guo and a Chinese national have the same fingerprints. Also, in November 2023, 17 Chinese nationals were arrested in Brgy. Balantang, Jaro, here in Iloilo City due to cybersex and human trafficking,” kabahin sang sulat.
Bilang pagtapos sang sulat, ginplastar sang mamalidha ang safety sang mga Ilonggo kag ang importansya sa pag-proteher sa national security sang Pilipinas.
“Given these, I would like to respectfully request that your good office investigate this matter through the National Bureau of Investigation and Bureau of Immigration in earnest. We want to ensure that our people are safe and that our national security is protected.”
Nahibaluan nga magluwas diri, may natalana man nga committee of the whole hearing sa Iloilo City Council agud nga ma-imbestigaran ang amo man nga isyu.#
