Ginpanginwala ni Iloilo City Lone District Representative Julienne Jam-Jam Baronda ang mga alegasyon batok sa iya sang mga ex-Marines.
Ini matapos nga nalakip si Baronda sa ginhingadlan sang nga nagpakilala nga ex-Marines nga gindul-ongan sang maleta nga may kwarta.
Sa statement nga ginpagwa ni Baronda, ginsiling sini nga sa baylo nga maghatag sang atensyon sa sini nga kabutigan, pangamuyuan na lang sini nga mangibabaw ang kamatuoran.
Suno sa iya, wala gid namitlangan ang iya pangalan sa ano man nga inquiries nga ginpatigayon sang Kamara, Senado, ukon sang Independent Commission for Infrastructure.
Ginalantaw naman nga rason sang kongresista kun ngaa ginadalahig siya diri amo ang iya kaangtanan sa isa ka lokal nga personalidad nga nangin kritikal sa tinalikdan nga administrasyon.
Suno diri, ang amo nga personalidad ang nagabulig sa iya sa pulitika.
Nagasalig man ini sa kaalam sang mga Ilonggo agud makit-an kun ano gid ang kamatuoran.
Kahapon sang nagpaguwa sang alegasyon ang mga nagpakilala nga anay mga miyembro sang Philippine Marines nga naga-claim man nga nag-deliver sila sang P805 billion nga cash nga nakabutang sa maleta kanday President Ferdinand Bongbong Marcos Jr. kag former House Speaker Martin Romualdez.
