Suksukon nanday Carlo Paalam kag Nesthy Petecio — flag-bearers sang Pilipinas sa Paris Olympics — ang barong nga gin-desinyo sang popular nga Filipino designer nga si Francis Libiran.
“This barong symbolize[s] bravery and national pride. On the detail, every element of the design showcases the rich cultural heritage of the Philippines,” suno sa post sang Philippine Olympic Committee.
Ini nga barong ang human sang piña-jusi fabric.
Ang boksidor nga sanday Petecio kag Paalam ang magasabak sa Olympiada sa ikaduha nga tion matapos pareho man nga nagdaog sang silver medal sa Tokyo Olympics sang 2021.
Marso sang nakuha ni Petecio ang ticket sini para sa Paris Games paagi sa paglutos kay Esra Yildiz Kahraman sang Turkey sa women’s 57kg division sa una nga World Olympic Qualification Tournament sa Italy.
Nangin mabudlay naman ang banas ni Paalam bangud nag-atras ini sa una nga qualification tournament bangud sa injury sa abaga, apang sang nahatagan sang ikaduha nga tyansa nga maka-compete sa qualifying games sa Bangkok, Thailand subong nga bulan, wala na sini ginpalampas ang oportunidad kag nag-qualify maan paagi sa paglutos kay Sachin Siwach sang India sa men’s 57kg class.
Patigayuon ang 2024 Olympics halin sa Hunyo 26 tubtub sa Agusto 11 kun sa diin nakatalana naman ang opening ceremony sa Jardins du Trocadéro kag River Seine.
As of press time, ang mga kuwalipikado na nga magtiglawas sa Pilipinas amo sanday Tokyo Olympics bronze medalist Eumir Marcial, ang debutants nga sanday Aira Villegas kag Hergie Bacyadan sa boxing; pole vaulter nga si EJ Obiena; fencer nga si Samantha Catantan; gymnasts nga sanday Carlos Yulo, Aleah Finnegan, Emma Malabuyo kag Levi Ruivivar; rower nga si Joanie Delgaco; kag weightlifters nga sanday John Ceniza, Elreen Ando, kag Vanessa Sarno.
