Barotac Viejo PNP, ginahanda na ang papeles agud mapasakaan sang kaso ang myembro sang BJMP nga nagpangluthang patay sa Poblacion, Barotac Viejo, Iloilo

BAROTAC VIEJO, ILOILO – Ginahanda na sang Barotac Viejo Municipal Police Station ang mga papeles agud nga mapasakaan na sang kaso ang myembro sang Bureau of Jail Management and Penology matapos ginluthang patay ang isa ka lalaki sa Poblacion Barotac Viejo, Iloilo.

Ang biktima amo si Ernesto Escaro Jr. samtang ang suspek naman amo si Ryan Tupas.

Sa interview sang Bombo Radyo kay Police Major Ciriaco Esquilarga, hepe sang Barotac Viejo PNP, iya ginpahayag nga ginpalapitan lamang sang suspek si Escaro kag gintiro gamit ang 45 caliber pistol.

Suno kay Esquilarga, pilas sa likod kag tyan ang naangkon sang biktima nga gintunaan sang iya kamatayon.

Ginhanaan man ni Tupas nga tiruhon ang lalaki nga magbulig kuntani sa biktima apang wala naglupok ang iya armas.

Nadakpan naman ang suspek pinaagi sa hot pursuit operation.

Dugang pa sang natungdan, madamo sang mga reklamo nagikan sa mga pumuluyo nga masami nagapangtaya si Tupas sang armas kag may napatay naman ini sang 2015.