Nagpaguwa sang iya nga statement si suspended Cavite 4th District Rep. Kiko Barzaga kaangot sa kamatayon ni Dueñas, Iloilo Vice Mayor Aimee Paz Lamasan.
Sa iya Facebook post subong nga adlaw, Enero 2, may caption ini nga: “Congressman Barzaga’s Speech on the Vice Mayor Aimee Lamasan Murder Incident.”
Ginsal-ot sini sa video ang mga personalidad sa Iloilo nga suno sa iya mga “notable figures” sa “flood control corruption scandal.” Ginbutang sini sanday Iloilo Third District Representative kag Senior Deputy Majority Leader Defensor; kag First District kag Deputy Speaker Janet Garin kag anak sini nga si Board Member Rica Jane Garin.
Ginpasuni man ni Barzaga nga makaduluda ang timing kag nature sa likod sang kamatayon ni Lamasan. Suno sa iya, “An investigation must be made to determine whether her death was caused by her knowledge of the flood control anomalies in the province of Iloilo.”
Nag-“Happy New Year” pa ini sa katapusan sang iya nga video.
Una na nga ginpahayag sang Iloilo City Police Office (ICPO) nga natabo ang insidente sa isa ka residential village sa Barangay Tabuc Suba, La Paz, Iloilo City sang Disyembre 30.
Base sa inisyal nga reports, ginapreparar sang vice mayor ang mga gamit sini, apang aksidente sini nga napitik ang trigger sang iya pusil kag naigo siya sa tuo nga bahin sang iya nga tiyan. Ginpaidalom pa si Lamasan sa operasyon, samtang napatay sang Bisperas sang New Year samtang padayon siya nga ginabulong sa ospital.
Nagtukod na ang ICPO sang Special Investigation Team agud nga lantawon ang sirkumstansya sa likod sang kamatayon sini.
Sa statement naman sang pamilya Lamasan, ginsiling nila nga ipaguwa nila ang official cause of death ni Lamasan kun mangin available na ang supporting documents.
“During this difficult time, the Lamasan family respectfully requests continued prayers for the eternal repose of the soul of Honorable Aimee Paz Lamasan, and for strength for her bereaved loved ones as they mourn her loss,” suno sa pamilya Lamasan.#
