Molo, Iloilo City – Posible nga pamilyar sa lugar ang ginbansagan nga “Basag Kotse Boy” matapos nga nangawat sang pila ka mga food items kag gamit sa isa ka salakyan sa Barangay San Antonio, Molo, Iloilo City.
Sa interview sang Bombo Radyo kay Police Captain Benjie Dicen, hepe sang Molo Police Station, iya ginpahayag nga nahibaluan sang kawatan kun sa diin nakaplastar ang closed-circuit television, rason nga wala nakit-an sa footage ang itsura sini.
Nahibaluan nga nagdangat sa masobra sa P4,000 nga balor sang food items ang nataban sang kawatan.
Suno kay Dicen, nakasuksok sang duag orange ukon black nga T-shirt kag brown nga short pants ang kawatan.
Ginpahayag dugang sang natungdan nga narekober sang mga kapulisan ang isa ka ginpatiko nga kabilya nga posible gingamit sang kawatan sa pagbuka sang bintana sang salakyan.
