PASSI CITY — Nag-abot na sa Passi City Arena ang pila ka mga Basketball teams nga magapartisipar sa The Asian Tournament 2024.
Sa interview sang Bombo Radyo kay Mr. Bryan Tabañag, Deputy Head sang pahampang, iya ginpahayag nga ang tournament masugod sa Mayo 21 tubtob Mayo 27, 2024 kag ginakabug-usan sang walo ka mga ginakabig nga top basketball teams sang Asya.
Suno kay Tabañag,ini amo ang Vanta Black Dragons, East Sea Pirates, Pola Pilipinas RPG, Jambo Warriors, Macau Black Bears, Taiwan Mustangs, Zamboanga Valientes kag Alas Pilipinas.
Ginakabig naman nga ini ang labing-una nga kahigayunan nga mangin tagbalay ang Passi City, Iloilo sang isa ka international basketball event.
Nagpasalig naman ang Passi City Police Station nga hugton ang seguridad sang lugar kag mga Asian players samtang sila ang yari sa Iloilo.
Suno kay Police Lieutenant Benjo Clarite, hepe sang nasambit nga police station, iya ginpahayag nga maga-provide sila sang security assistance sa tanan nga engagement areas sang syudad agud mapabilin ang kalinong kag katawhay sang aktibidad.
Ginpahayag man ni Clarite nga maga-deploy man sila sang mga personnel sa pila ka mga parte sang Passi City bangud bukas sa tanan ang amo nga tournament.
Iga-implementar man sang talatapan ang pagdumili sa mga residente nga makasulod sa Passi City arena kun ini ang buta na.
