Masami sa mga drivers ang upod sa pagbyahe ang ila mga asawa, apang indi ini kaangay sa isa ka ‘amazing father’ nga ang dala sa iya pagbyahe amo ang iya duha ka mga kabataan.
Ini amo si Mr. Romel Chavez, tumandok sang Sagay City, Negros Occidental, nakapangasawa sang taga Concepcion, Iloilo kag subong nagatinir sa syudad.
Sa interview sang Bombo Radyo kay Chavez, iya ginpahayag nga gina-upod niya sa pagbyahe ang iya 10 kag siyam ka tuig nga mga bata bangud nagakahangawa ini nga ibilin sa balay nga wala sang bantay.
Nagatrabaho man ang iya asawa kag wala sang mabilin sa ila duha ka mga bata.
Kinahanglan suno sa iya nga magtinguha sila sang iya asawa agud nga masuportahan ang ila pamilya.
Ilabi na nga subong, mas magamay ang kita sini sa pagbyahe bangud sa padayon nga pagsaka sa presyo sang gatong.
Apisar nga masami adlaw adlaw ini nga maaga pa kag wala na nagapamahaw nga nagahalin sa ila balay, ang importante suno sa iya nga may kwarta siya nga madala pauli sa tion sang kagab-ihon.
Ginatatak man sang natungdan sa iya mga kabataan nga hatagan sang importansya ang edukasyon.
Nagapasalamat man ini sa iya asawa nga yara gid agud nga buligan siya sa pinansyal man kag emosyonal nga aspeto.
“Basta Driver, Sweet Lover” isa ka masami panglantaw sa mga drivers nga ginpanindugan ni Chavez nga para lang sa iya pamilya.
Ang pagpalangga ang iya lang ihatag sa iya asawa kag mga kabataan.
Handa siya nga antuson ang kakapoy kag kapigaduhon para sa bwas damlag sang iya pamilya.
