Lauman sa katapusan nga tuig 2027 mangin bastante na ang tubig sa Iloilo City samtang nagapadayon ang pag-ilis sang mga daan nga pipes sang Metro Pacific Iloilo Water kag maka-develop sang dugang nga sources sang tubig.
Suno kay Mayor Raisa Treñas, gina-monitor sang city government ang mga proyekto sang water company agud masiguro nga may yara sang supply sang tubig para sa mga residente, ilabi na sa tion sang El Niño phenomenon.
Isa sa mga major projects sang MPIW amo ang desalination project, sa diin ginalauman nga makahatag ini sang dugang nga 65 million liter sang tubig kada adlaw.
Gina-monitor man sang syudad ang pag-ilis sang mga daan nga water pipes kag pagbuhin sang non-revenue water.
Pahayag sang alkalde, ang non-revenue water sang MPIW yara malapit sa 50 percent.
Apang nagpasalig man ang MPIW suno kay Mayor Treñas nga mabuhinan ang non-revenue water level sa katapusan sang subong nga tuig.
Ginpahayag man sang alkalde nga regular ini nagapakigsapol sa MPIW agud i-review ang proyekto kag ma-address ang mga problema nga nagaapekto sa water services.
Samtang, ginpabutyag man ni Mayor Treñas nga magahingyo siya sa kompaniya nga magpangita sang dugang ukon backup sources sang tubig agud masiguro nga estable ang supply sa tion sang El Niño.
