Nabaton na sang opisina ni Davao City Mayor Sebastian “Baste” Duterte ang subpoena ukon mando nga magtestigo siya sa impeachment trial sang iya utod nga si Vice President Sara Duterte.
Nakabutang sa subpoena nga nabaton sang opisina ang order sang impeachment court sang Setyembre 22, 2026 paagi sa Administrative Services Division.
Ginmanduan si Mayor Duterte nga mag-atubang sa Impeachment Court sa Setyembre 28, 29 kag 30, alas-10 sang aga, sa Pasay City.
Ini nga subpoena ad testificandum et duces tecum ang may kaangtanan sa GenCorp Industries Incorporated, nga gin-deklara ni Vice President Sara bilang isa sa iya business interests sa iya 2024 kag 2025 Statements of Assets, Liabilities and Net Worth ukon SALNs.
Ang GenCorp nakakuha sang mga kontrata sa Davao City government, kag suno sa city government, naglab-ot sa 19 ka kontrata nga nagabalor sang P33.2 million.
Ginmanduan man sang korte si Mayor Duterte nga magdala sang certified true copies kag kompleto nga electronic records sang mga may kaangtanan nga kontrata kag transactions halin 2020 tubtob sa subong nga nagalakip sa GenCorp kag mga korporasyon ukon entity nga nagapadagan sang mga Jollibee branch sa Davao City.
Sa isa ka statement, ginpahayag ni Mayor Duterte nga siya kag ang iban pa nga city government officials wala nakahibalo sa ginapahayag nga koneksyon sang iya utod sa GenCorp.
Ginpahayag man niya nga ang apelyido nga “Duterte” wala nagguwa sa bisan isa sa 19 ka kontrata sang city government kag GenCorp.
