Nag-abot sa Pilipinas ang panibag-o nga basura nagikan sa Australia samtang wala pa natapos ang problema sa mga basura nga nagikan sa Canada.
Ginapahayag nga naka hold subong sa Mindanao Container Terminal sa Tagoloan, Misamis Oriental ang pito ka mga container nga naga-unod sang mga basura.
Suno kay John Simon, collector sa Port of Tagoloan, Bureau of Customs, madamo sang salabton ang broker sang nasambit nga shipment apang wala na niya ini ginhingadlan pa.
Ang broker subong, amo man ang broker sang masobra 1,000 nga tonelada nga basura nagikan sa South Korea nga nag-abot man sa Tagoloan, Misamis Oriental sang Hulyo kag Oktubre 2018.
Sa una nga report sang taga-Environmental Management Bureau sang Department of Environment and Natural Resources, ginlaragway nila ang mga basura nga “shredded municipal waste”.
Ginapahayag nga gindeklara ang mga kargamento sa Customs bilang “processed engineered fuel” ukon PEF.
Ang PEF amo ang alternative fuel sa paghimo sang semento nagikan sa gina-proseso nga basura.
Depensa sang kompaniya, indi basura ang naglab-ot sa Pilipinas nagikan sa Australia sa diin ini ang low grade fuel.
Apang sa bahin naman ni Joel Pinawin, Customs Intelligence and Investigation Service (CIIS), iya ginpahayag nga apisar ano man ang ihambal sang kompaniya, basura man ini sa gihapon sa diin banned item ini.
Iga-paidalom naman sa scientific test ang naka-hold nga shipment agud mahibaluan kun ini amo ang PEF ukon ordinaryo nga municipal waste lamang.
Ang mangin resulta sang test ang mangin basehan sang Bureau of Customs agud mahibaluan kun may yara sang nagakadapat nga manabat sa layi.
Apang para sa Eco Waste Coalition, maathag nga basura sang mga foreigner ang nakasulod na naman sa Pilipinas kag makapamaayo kun ibalik ini gilayon sa pungsod Australia.
Ginkapikon naman ni Presidente Rodrigo Duterte ang mga basura sang Canada bangud tubtob subong wala sa gihapon mahatagan sang aksyon sang nasambit nga pungsod agud nga makuha na ang mga basura nga gindala sa Pilipinas.
