Naglab-ot sa tatlo ka truck ang nakuha sang City Environment and Natural Resources (CENRO) nga mga basura sa palibot sang city proper kasunod sang tatlo ka separado nga mga aktibidad sang nagligad nga adlaw.
Sa interview sang Bombo Radyo kay Engineer Niel Ravena, Head sang Iloilo City Environment and Natural Resources, iya ginpahayag nga bangud sa sunod-sunod man nga mga kahiwatan, insigida nga ginmanduan sini ang mga personnel sang talatapan nga limpyohan ang mga dalan ilabi na ang JM Basa Street, City Proper kag Provincial Capitol.
Suno kay Ravena, isa gid ka truck ang gin-deploy sa Iloilo Provincial Capitol agud nga maghakot sang mga natipon nga basura sa lugar.
Ginpahayag man sini nga nagpadala man ang talatapan sang water tanker agud nga mag-flushing sa mga dalan agud nga indi ini mangin madanlog para sa mga motorista.
Mas madamo naman ang natipon nga basura halin sa provincial capitol kon ikumpara sa mga natipon sang CENRO sa city proper.
