[Trigger Warning: Sensitive Content/ Mention of Rape and Abuse]
Ginkumpirma sang Lambunao Municipal Police Station nga may senyales sang sexual abuse sa kinatawo sang pito ka tuig nga bata nga ginpatay sa sulod sang ila balay sa Brgy. Tampucao, Lambunao, Iloilo.
Ang biktima amo si alyas Bebe, pito ka tuig ang edad, kag nasapwan sang iya nga lola sa ila banyo nga nasulod sa sako, may higot ang liog, kag wala na sang pang-idalom nga panapton.
Sa interview sang Bombo Radyo kay Police Captain Jose Winston Biadog, hepe sang Lambunao Municipal Police Station, iya ginpahayag nga matapos ang ginpatigayon nga autopsy, nakita nga ang gintunaan sang kamatayon sang biktima amo ang pagkakuga.
Samtang, may ara naman sang lima ka persons of interest nga ginasundan ang kapulisan kun sa diin, lunsay napaidalom na ang mga ini sa swabbing.
Gintuad man sang natungdan nga ang mga person of interest ang ara na sa legal nga pang-edaron kag isa diri ang himata man sang biktima,
Gin-angot ang mga ini sa imbestigasyon bangud malapit ang mga ini sa lugar kag oras sang natabo ang krimen.
Posible magpangatubang sang kaso nga rape with homicide ang suspek sa kamatayon sang biktima.
