Patay ang isa ka 11-anyos nga bata matapos nga gintublukan sang ikaduha nga anesthesia samtang ginapaltak sa klinika sang isa ka ginapatihan nga doktor sa Mulanay, Quezon.
Ang bata amo si L.A. Reaño nga nagaisahanon nga anak sang mag-asawa nga sanday Marlon kag Jenny Reaño.
Suno sa ginikanan, natabo ang insidente sang nagligad pa nga Abril sa isa ka klinika sa Mulanay kag ginkuhaan pa nila sang video ang pag-circumcise sa ila bata.
Apang bag-o pa man nagsugod, nagkurog-kurog ini sang gintublukan sang anesthesia tubtob nga nabugtuan sang ginhawa.
Luyag nanday Marlon kag Jenny nga manabat ang doktor sa natabo kag mabawian ini sang lisensya.
Natalana nga ipatawag sang NBI ang doktor agud pangayuan sang paathag.
Nahibaluan nga matapos mabatian sang mag-asawa ang natabo sa 10-anyos nga lalaki nga napatay man matapos ginpaltak sa Tondo, nangayo man sila sang bulig sa NBI para makasuhan ang duktor.
