ILOILO CITY – Ginakabig nga mapalaron ang isa ka bata nga lalaki sa Bangladesh bangud nga naka-survive ini sa sa sulod sang shipping container samtang nga nagahampang sang hide and seek ukon panagu-ay kag nasiraduhan sang sulod sang anum ka adlaw.
Sang damlag lang, samtang nga naga-unload sang containers sa isa ka Bangladeshi vessel ang isa ka staff sa port sang Malaysia, nakibot ini matapos nga nakita ang isa ka bata nga lalaki nga naggwa sa container.
Indi ini maka-intindi sang ila nga lenggwahe gani indi ini makuhaan sang impormasyon.
Ang abi nila, biktima ini sang human trafficking crime organization gani nagtawag sila sang pulis.
Apang sang ulihi, nahibaluan nila nga naghampang ini sang hide and seek upod sa iya mga abyan sa Chittagong, Bangladesh kag nagsulod sa shipping container kag nasiraduhan sang pila ka adlaw sa barko padulong sa Malaysia.
Sa sulod sang anum ka adlaw, wala man nakakaon si Fahim.
Gindala ini sa ospital kag ginaproseso na ang pag-repatriate sa iya balik sa iya pungsod sa Bangladesh.
