GUIMARAS– Hustisya ang gina singgitan sang mga himata sang napatay kag biktima sang tatlo ka mga nga motorbanca nga nagkulob kag nagkapan sa tunga sang Iloilo Strait.
Sa interview sang Bombo Radyo kay Dexter Gardoce, bata ni Nina Gardoce isa sa mga napatay sa nagkulob nga motor banca nga MB Gene Vince, iya ginpahayag nga luyag nya makabaton sang pagpa-athag halin sa Philipine Coastguard-Iloilo kun ano ang matuod nga natabo sa pag rescue sa mga biktima.
Suno sa iya luyag nya mahibaluan kun ngaa nagdugay ang pag rescue kag kun ngaa ginpabay-an nalang nga naga utaw-utaw sa tunga sang dagat ang pumpboat apisar wala pa nakuha ang tanan nga pasahero sa sulod sang bangka.
Dugang nya kun tani buhi pa ang iya iloy kun wala ginpabay-an sang rescuers ang mga biktima sa sulod sang nagkulob nga motor banca.
Suno pa gid sa natungdan nagakadapat lang nga may yara sang masabat sang natabo nga insidente bangud madamo nga kabuhi ang nadula.
Nagalaom si Gardoce nga kun tani mangin mas preparado ang Philippine Coastguard-Iloilo agud indi na maliwat pa ang kaangay nga trahedya.
