Naghatag sang bulig kag suporta sang Batad Municipal Police Station sa pamilya sang napatay nga subject nga nalakip sa disgrasya sang ila patrol car sa Barangay Natividad, Barotac Viejo.
Ang napatay amo si John Baldomero, 44-anyos, residente sang Barangay Alinsulong, Batad.
Sa interview sang Bombo Radyo kay Police Captain John Predic Padilla, hepe sang Batad MPS, iya ginpahayag nga nakahatag na sila sang inisyal nga mga bulig sa pamilya kaangay sang groceries kag iban pa nga burial assistance.
Suno kay Padilla, nagapasalig man sila sa pamilya sang nagtaliwan nga handa sila maghatag sang
dugang pa nga bulig kung ginakinahanglan.
Nahibaluan man nga pilason man ang tatlo ka mga pulis nga sakay sang patrol car kag padayon nga nagapaayo subong amo sanday: Police Master
Sergeant Renante Fuentes (driver), Police Master Segeant Francis John Aricaya kag Police Corporal Joseph Asturias.
