Ginpaidalom na sa lockdown ang Batasang Pambansa Complex kun sa diin nahamtang ang Kamara bilang kabahin sang pagpanghugot sang seguridad para sa ikaduha nga State of the Nation Address ni President Ferdinand Marcos Jr. sa Lunes, Hulyo 24.
Suno kay House Secretary General Reginald Velasco, may himuon man nga technical rehearsal subong nga Byernes.
Iga-inspect man ang tanan — indi lamang ang security kundi ang equipment, personnel, kag may yara man sang simulation exercises.
Nagapanguna sa pagpasiguro sang seguridad ang Presidential Security Group (PSG), Philippine National Police (PNP), kag ang Armed Forces of the Philippines (AFP).
Suno kay Velasco, magluwas sa SONA, ginapreparahan man ang pagbukas sang Second Regular Session sang 19th Congress nga natalana naman sa Lunes sang 10:00 sa aga.
Una na nga ginpahayag nga ang mga bisita ang kinahanglan nga mag-presentar sang ila nga COVID-19 vaccination card.
Ginpahayag naman sang National Capital Region Police Office (NCRPO) nga may 20,000 ka mga pulis nga i-deploy para sa amo nga importante nga adlaw.#
