Sa baylo nga magpain sang dugang nga pondo kag magpangabudlay sa pagtuon sa humay, mas maayo suno kay Senator Ronald “Bato” dela Rosa nga magtutok ang Department of Agriculture (DA) sa root crops bangud mas healthy ini kag mas makaluwas kun may matabo nga mga bagyo.
Ginhimo ni Dela Rosa ini nga suhestyon sa Senate finance subcommittee hearing kun sa diin nakatutok ang diskusyon sa 2023 budget sang DA sa rice research kag sa lihok sang ahensya sa paghatag sang ayuda sa mga mangunguma.
Suno sa senador, may medical professionals nga nag-advise sa iya nga likawan ang rice bangud mataas ang risgo nga makaangkon siya sang diabetes.
Naghatag pa sang halimbawa ang senador nga sang gamay siya, wala sila sang kuwarta apang wala sila nagakagutman bangud madamo sila sang tanum nga rootcrops sa ila ugsaran.
“Akala ko noon ay ‘yung ginagawa ng nanay ko ay dahil sa aming kahirapan. Pero ngayong tumanda na ako, sabi ng mga health experts, sabi ng mga fitness and wellness experts, ‘wag ka sige kain ng rice dahil ‘yan ang source ng diabetes. Tapos etong mga healthy na pagkain na mga root crop, mas gaganda katawan,” suno kay Dela Rosa.
Bangud ginakutkot pa ini nga mga kamote, balinghoy, gabi, kag iban pa nga root crops suno kay dela Rosa, makaluwas ini kun may matabo gid man nga bagyo, indi kaangay sa humay nga nagakahapay.
Suno naman kay Agriculture Senior Undersecretary Domingo Panganiban, may yara na sang crop diversification program ang ahensya kun sa diin ginaduso nga mahimo matamnan sang iban nga tanum ang lugar nga para sa humay.
Ginatinguhaan man sang ahensya suno kay Panganiban nga mag-establisar sang urban agriculture program agud masiguro nga may kaugalingon man nga suplay sang pagkaon ang mga tawo nga nagapuyo sa mga syudad ukon highly-urbanized areas.
Nag-ugyon man si Senate Minority Floor Leader Koko Pimentel kay Dela Rosa nga mahimo nga makaumpisa ang programa sa kamote bangud mahimo ini matanum bisan diin lang, indi pareho sa iban nga root crops nga kinahanglan gid pilion ang mga lugar.##
