Matapos ang binulan nga pagpanago bangud sang ginaalegar warrant of arrest batok sa iya, ginabati-bati nga magatuhaw na gid man si Senator Ronald “Bato” Dela Rosa: indi sa Senado, kundi sa Baguio City.

Lakip ini sa kaundan sang sulat nga ginpadala ni Dela Rosa kay Senate President Vicente “Tito” Sotto III nga napetsahan Marso 12, 2026.

Sa amo nga sulat, nagahingyo ang senador nga pagamiton ang iya pamilya sang Senate Mansion sa Baguio halin sa Marso 26 tubtub 29.

Ginpahayag ni Dela Rosa nga para ini sa Chief of Staff of the Armed Forces of the Philippines ukon CSAFP Cup 2026, isa ka shooting competition kun sa diin involved ang uniformed services sang pungsod.

Hiwaton ini nga kumpetisyon sa Philippine Military Academy (PMA) firing range sa Fort Del Pilar, Baguio City.

“The mansion will be used solely to accommodate the undersigned’s family during the CSAFP Cup 2026 in Baguio City,” suno sa sulat nga pirmado mismo ni Dela Rosa.

Apang base sa inisyal nga impormasyon, gina-renovate subong ang Senate Mansion gani posible nga indi man ini pag-ipagamit. Ginahulat pa ang pormal nga sabat sang Senado.

Sa idalom sang pagsulundan sang upper chamber, mahimo lamang magamit ang Senate Mansion sa Baguio kun yara mismo ang pisikal nga presensya sang senador nga naga-request.

Nahibaluan nga missing in action si Dela Rosa halin sang Nobyembre 2025.

Nag-umpisa ini matapos gin-anunsyo ni Ombudsman Jesus Crispin “Boying” Remulla nga nakit-an na sini ang ginaalegar kopya sang alleged warrant of arrest halin sa International Criminal Court (ICC) batok kay Dela Rosa.

Ginhingadlan ang amo nga senador (nga former PNP chief) bilang alleged co-conspirator sa crimes against humanity case nga ginapangatubang ni former President Rodrigo Duterte.

Apisar nga wala ginkumpirma sang ICC kun ano ka matuod ang claim ni Remulla, wala na nagpakita si Dela Rosa sa tanan nga official activities, hearings, kag sessions sang Senado apisar nga nagabaton gihapon ini sang iya nga sweldo.#

RELATED ARTICLESMORE FROM AUTHOR