Nanindugan ang kampo ni Senator Ronald “Bato” Dela Rosa nga indi siya fugitive from justice kaangay sang akusasyon sa iya sang Office of the Solicitor General.
Sandig ini sa sabat sang mga abogado ni Dela Rosa nga ginpasa sa Korte Suprema kasunod sang komento sang SolGen sa iya gin-file nga petisyon kasunod sang paggwa sang arrest warrant halin sa International Criminal Court (ICC).
Gin-insister ni Atty. Israelito Torreon, ang legal counsel ni Dela Rosa, nga dapat magpagwa na gilayon ang Supreme Court sang temporary restraining order (TRO) ukon status quo ante order batok sa implementasyon sang arrest warrant sang International Criminal Court (ICC).
Ginhingyo man sini sa high court nga balabagan ang DOJ, DILG, NBI, PNP, PCTC, former Senator Antonio Trillanes IV, kag iban pa nga nagahulag sa idalom sang ila awtoridad nga dakpon, i-detain, i-transfer, itugyan, ukon kuhaon siya sa Pilipinas base sa ICC warrant, Interpol Red Notice ukon Diffusion, PCTC communication, foreign ukon international request, ukon executive directive nga wala sang valid nga warrant halin sa korte sang Pilipinas.
Ginpangayo man ni Dela Rosa nga punggan ang mga awtoridad sa pagsulod, pagtinir, ukon pagbalik sa Senado agud dakpon, bantayan, ukon kuhaon siya ukon ang bisan sin-o nga nagapungko nga senador nga wala sang warrant halin sa local court.
Ginpabutyag pa ni Dela Rosa nga indi dapat mapunggan ang iya kinamatarong kag katungdanan bilang senador nga magsulod sa Senado, magtambong sa session, magboto, mag-upod sa deliberasyon, kag magtuman sang iya legislative functions.
Magluwas sa TRO, ginpangayo man niya sa SC nga magpagwa sang writ of preliminary injunction kag sa ulihi permanent injunction may kaangtanan sa nasambit nga mga relief.
Matandaan nga sang Domingo, Mayo 17, sang gin-release naman ang 74 ka pahina nga komento sang state lawyers sa pagpanguna ni Solicitor General Darlene Berberabe.
Gintawag nila si Dela Rosa nga “fugitive from justice” nga nagamanipula sang legal system agud nga palagyuhan ang ICC arrest warrant nga ginkumpirma naman sang international tribunal nga ila gin-release sadto pa nga Nobyembre 5, 2025 kag gin-unseal ukon ginpakita sa publiko sang Mayo 11, 2026.#
