ILOILO – Yara na sa maayo nga kahimtangan ang batter sang 4th CDSA nga nagikan sa Anilao National High School matapos nga aksidente nga maigo sang bola sang pitcher sang ila kasumpong nga 1st CDSA nga amo ang Igbaras National High School sa ginpatigayon nga baseball match sa Iloilo School Sports Council 2019.
Ang biktima ginkilala nga si Carlo Pedilla samtang ang pitcher naman nga naka igo sa iya amo si John Marco De Pedro.
Sa interview sang Bombo Radyo kay Mr. Nicasio Valenzuela, sports coordinator sang Department of Education-Iloilo iya ginpahayag nga nakabalik na sa billeting area si Pedilla.
Suno kay Valenzuela, base man sa anunsyo nga ginpagwa ni Anilao Mayor Nathalie Ann Debuque normal ang resulta sang CT scan ni Pedilla kag nakatalana ini nga magpa check up liwat sa ENT specialist base man sa abiso sang iya nga doktor.
Nahibaluan nga nag agom sang pilas si Pedilla sa iya nga agtang kag nadaplisan man ang iya mata matapos nga ma igo sang bola.
