Nangin mas kumplikado ang kondisyon sa ikaayong lawas sang actress-host nga si Kris Aquino sa pagsugod sang 2024.
Ginsiling sini sa fans nga padayon siya nga magabato kag indi magpaluya apisar pa nga may sintomas na naman sang lain na naman nga autoimmune disease nga nakit-an sa iya lawas.
Suno pa sa 52-anyos nga aktres, mahina na ang iya lawas halin pa sa Thanksgiving Day sa Amerika kag nadulaan na ini sang gana nga magkaon kag masami nga nagasakit ang ulo.
Ang bag-o nga sintomas sang posible lain na naman nga autoimmune connective tissue disease ang nagtuga sang rashes sa iya nawong. Posible suno sa iya nga yara siya sa initial stage sang Systemic lupus erythematosus ukon lupus.
“I’m at the initial stage of SLE or what’s commonly known as lupus… My battle has become more complex BUT I promised my sons and my sisters I won’t be a wimp. And I’m promising all my friends plus all who continue to pray for me: bawal sumuko, tuloy pa rin ang laban,” pahayag sini.
Suno sa Centers for Disease Control and Prevention, nagakatabo ang lupus kun gina-atake sang immune system ang kaugalingon nga tissues kag nagatuga sang inflammation kag tissue damage sa organs. Maapektuhan sini ang joints, lungs, brain, kidneys, kag blood vessels.
Nahibaluan nga antes sini nga update halin kay Kris, nasapubliko na nga may yara siya sang lima ka delikado nga autoimmune diseases nga rason sang iya nga health treatment sa Amerika sa sulod sang pila na ka tuig.
