ILOILO CITY– Nagakadapat nga ipagwa na sang gobyerno ang resulta sang imbestigasyon sang Philippine Coast Guard (PCG) kag sang Maritme Industry Authority (Marina) tuhoy sa Recto Bank incident sa West Philippine Sea.
Sa exclusive interview sang Bombo Rady kay Bayan Muna Rep. Carlos Isagani Zarate kag katapo sang Makabayan bloc sa Kamara, iya ginpahayag nga dapat mapagwa na ang resulta sang imbestigasyon kag indi na paghulaton pa ang desisyon sang China.
Nagakadapat man suno kay Zarate nga indi na magdepende pa ang Pilipinas sa kun ano ang ihambal sang China, bangud ang natabo sa Recto Bank ang ginhungod nga pagbunggo sa sakayan sang mangingisda nga Pinoy.
Nagakadapat man nga manindugan ang gobyerno sa kun ano ang insakto kag kun kinahanglan nga pasakaan sang nagakaigo nga kaso ang mga nakasaya sa Chinese fishing vessel, nagakadapat ini nga himuon.
Sa pagbukas sang sesyon sang Kamara sa Hulyo 22 suno kay Zarate nagapasaka siya sang resolusyon nga magpatigayun man sang imbestigasyon tuhoy sa natabo sa recto bank.
Sa nasambit nga imbestigasyon igapatawag ang katapo sang PCG, Marina, mga nabiktima nga mangingisda kag kun mahimo magapadala man sang imbitasyon sa embahada sang China agud makuha ang bahin sang tagsa-tagsa.
Samtang gindugang man ni Zarate nga santo sa konstitusyon may kinamatarung ang mga pumuluyo nga magfile sang impeachment complaint batok sa Presidente sang Pilipinas apang ila man ini nga pagatun-an pag-abot sa Kamara.
