Nagpanawagan ang Bagong Alyansang Makabayan (Bayan) sa militar nga indi na magpahilabot sa tunga sang nagakatabo nga political crisis subong sa Pilipinas.
Ginpahayag ini ni Bayan Chairperson Teddy Casiño samtang ginaplastar ang mga plano sa anti-corruption protests sa Nobyembre 30 kun sa diin lakip sa igapanawagan amo ang pag-resign nanday President Ferdinand “Bongbong” Marcos Jr. kag Vice President Sara Duterte.
Sa interview sang Bombo Radyo kay Casiño, iya ginpahayag nga dapat nga pabay-an sang militar ang political process, respetuhon ang civilian sovereignty, kag pabayaan nga ang civilian component ang maga-resolba sa sini nga krisis.
Una na nga ginklaro sang Armed Forces of the Philippines (AFP) nga wala sang military junta sa sulod sang organisasyon kag indi ini magpartisipar sa anuman nga tuyo kaangot diri.
Pahayag sang military, nakahibalo sila nga may diskusyon sa “junta” sa retired officers, apang indi involved ang mga aktibo nga soldado sa sini nga sahi sang mga istorya.
“The AFP will never subscribe to any reset plot, and our Constitution has no cheat codes. So we will always go to the side of the Constitution, the constitutional processes that are in place,” kabahin sang statement sang AFP.
(Photo: Miguel de Guzman)
