Nakahanda ang progresibo nga koalisyon nga Bagong Alyansang Makabayan (Bayan) nga magpasaka sang ikaduha nga impeachment complaint batok kay President Ferdinand Marcos Jr. tungod sa paglapas sa pagsalig sang publiko sa isyu sang national budget kag multibillion-peso flood control scandal.
Ginpahayag ni Bayan president Renato Reyes nga ginalauman nga dal-on sa reklamo ang pag-abuso sa unprogrammed appropriations nga madugay na nga ginabantayan ni ACT Teachers Rep. Antonio Tinio kag ang ginahimo nga kickback scheme nga naguwa gikan sa sala nga paggamit sang national budget.
Suno kay Reyes nga nagalakip man sa mga nagareklamo ang mga nagabayad sang buwis, mga trabahador, mga mangunguma, estudyante kag iban pa nga nagapanindugan sa anti-corruption.
Dugang pa ni Reyes, importante ang pagpasaka sang ikaduha nga reklamo, bangod gin-kumpirmar ni House Secretary General Cheloy Garafil nga ang una nga impeachment complaint nga ginfile sang nakaligad nga semana napasa na sa opisina sang Speaker.
Kon ma-refer na ang una nga reklamo sa House Committee on Justice kag ikonsiderar ang pagpatuman sini, ang ano man nga masunod nga impeachment complaint indi na pwede ipasa sulod sang isa ka tuig.
Ginalauman ni Reyes nga ang verified complaint mapasa sa Speaker kag masulod sa order of business.
