Indi fare hike ang solusyon sa mataas nga presyo sang produktong petrolyo.
Ini ang nangin panindugan ni Bayan Panay Secretary General Elmer Forro sa pagpatuman na subong nga adlaw sang pagsaka sa pamasahe sa pampubliko nga mga salakyan.
Sa interview sang Bombo Radyo kay Forro, iya ginpahayag nga daw kaangay nga pampaumpaw lang ang nangin lihok sang Department of Transportation sa transport sector bangud sa mataas sa gihapon nga presyo sang gatong.
Suno sa iya, ang matuod nga solusyon sa nasambit nga problema amo ang pagpanubo sa presyo sang langis paagi sa pagdula sang excise tax, expanded value tax kag ang pagkontrol sang gobyerno sa presyohanay sang gatong paagi sa pagbasura sang Oil Deregulation law.
Pahayag niya, ini ang dapat hatagan sang nagakaigo nga tikang sang gobyerno agud mahatagan na sang insakto nga sabat ang ginapaligban sang publiko kag indi lang sang transport sector.
