Nagapati ang Bayan Panay nga indi maapektuhan ang ila patigayunon nga protesta kag transport strike sa buwas nga adlaw apisar nag-desisyon ang Western Visayas Alliance of Transport Cooperatives and Corporations Inc. nga indi mag-upod sa nasambit nga strike.
Sa interview sang Bombo Radyo kay Elmer Forro, Secretary General sang Bayan Panay ginpahayag sini nga gina-respeto nila ang desisyon sang amo nga alliance kag magapadayon sila sa ila operasyon untat-biyahe kag untat-tughong bilang pagpakita sang protesta.
Ginpabutyag man sini nga padayon ang ila grupo sa ila ginapanindugan kag nagapati sila nga paagi sa nasambit nga strike, mapalab-ot nila sa gobyerno ang ila hibubun-ot nga mga transport sector.
Dugang pa ni Forro, indi kuntento ang ila grupo sa ginapatuman nga rollback sa presyo sang gatong, bangod nagapati sila nga kulang ini kon ikumparar sa ginatawag nila nga “ginkawat” sang oil cartel halin sa mga konsumidor paagi sa sunod-sunod nga pagsaka sang presyo.
Dugang pa sang Bayan Panay nga magapadayon sila sa pagsinggitan tubtob mapamatian sang gobyerno ang ila mga sentimento sa tunga sang krisis.
